DAVAO CITY – Nalab-as gayud sa panumduman sa mga Dabawenyo ang nahitabong pagpamomba sa Davao City International Airport human nga gipahigayon karong adlawa ang ika 17 katuig nga komemorasyon sa nasangpit nga panghitabo.
Kahinumduman nga niadtong Marso 4, 2003, nahitabo ang usa sa pinakangilgig ug pinaka grabe nga terrorist attack sa nasud sa maong panahon diin usa ka bomba ang gitanom sulod sa usa ka backpack ang mibusikad sa maong airport ning syudad diin nagbilin kini og anaa sa 21 ka tao ang patay samtang anaa sa 148 sab ang na-angol.
Subay sa gipahigayong komemorasyon nga gitambungan mismo ni Davao City Mayor Inday Sara Duterte-Carpio, gipanawagan niini ngadto sa tanang Dabawenyo nga magtinabangay aron nga dili na subli pang mahitabo ang susamang insidente nga hinimuan sa mga terorista.
Dugang pa niini, gipasalig sab ni Mayor Inday nga ang lokal nga panggamhanan sa Davao inubanan sa tanang security forces ang magpabilin gayud nga magbinantayon ug matinud-anon sa pagserbisyo aron nga maprotektahan ang syudad gikan sa bisan unsa mang matang sa terorismo.
