DAVAO CITY- Gipangunahan sa City Social Welfare and Development Office (CSWDO) kauban ang mga Brgy. Officials ug kabanay sa mga biktima ang paghinumdom sa ika-13 nga tuig sa pagbaha sa Matina River nga mikalas og 31 nga kinabuhi.
Miduyog ang mga opisyal gikan sa Barangay Matina Crossing, Matina Aplaya, ug Matina Pangi, uban ang mga personahe sa Public Safety and Security Command Office, Task Force Davao, ug mga barangay responders sa CSWDO alang sa usa ka simple nga seremonyas nga pagdagkot og kandila ug paghalad og mga bulak sa Mahayahay Bridge, Matina Pangi, ning syudad.
Gipangunahan ang paghalad og ampo ngadto sa mga biktima ni Rev. Fr. Bong Gonzaga.
Samtang, nagpaabot sab og pasalamat pinaagi sa usa ka mensahe si Davao City Mayor Sebastian “Baste” Duterte ngadto sa mga responders nga nahimong bayani sa natigayong kalamidad.
Sumala pa ni Sara Festin, DSWDO Acting Officer-In-Charge nga nahimong eye-opener ang maong insidente sa kamahinungdanon sa pagbantay ug pagpartisipar sa paghinlo sa palibot aron makalikay sa susamang insidente.
Samtang, giawhag usab niini ang katawhan sa pagsiguro nga adunay maayong pundasyon ang ilang mga panimalay, lakip na ang pagsunod sa ipahamtang nga pre-emptive evacuation sa mga otoridad panahon sa pagbaha.
