DAVAO CITY – Mukabat sa 98 ka mga kasong pagpanglugos ang natala karon sa syudad sa Davao sukad niadtong bulan sa Enero hangtud Agosto 21 ning kasamtangang tuig.
Kini mismo ang gikumpirma ni Police Major Maria Teresita Gaspan, hepe sa Women and Children Protection Desk sa Davao City Police Office (DCPO).
Ang nahisgutang ihap ang mas taas kung itandi sa gikatalang 96 ka mga kaso sa susamang panahon niadtong milabay nga tuig.
Gikan sa 98 ka mga kaso, 89 sa mga biktima ang gilangkuban sa mga kababayen-an ug siyam ang mga lalakeng biktima.
Nasayran nga gikan sa maong mga kaso, 21 ang incestuous rape o mga kabanay lamang ang nanglugos sa mga biktima ug 45 ang gihimo sa kaila sa mga biktima.
Dugang pa ni Gaspan nga ang tanang 98 ka mga kaso ang gisang-at na sa korte diin ang tanang mga suspek ang giila na usab.
Ning kasamtangan, anaa na sa 38 ka pag-aresto ang napahigayon sa kapulisan.
Gikanayon ni Lorna Mandin, hepe sa Integrated Gender and Development Division (IGDD), nga ang pagtaas sa gikatahong kaso sa pagpanglugos ang posibleng timailhan nga hinay-hinay nang natapos ang “culture of silence” sa mga biktima sa pagpanglugos gumikan nagbaton na sila og ka-isog nga mosumbong pinaagi usab sa tabang sa mga nagkadaiyang ahensya nga naningkamot mahuman ang stigma batok mga biktima sa sexual crimes.
Dugang pa sa opisyal nga ang pakigbisog batok rape o pagpanglugos ang dili lamang responsibilidad sa kapulisan apan lakip na usab sa tibouk komunidad.
