DAVAO CITY – Misaka sumala pa ang ihap sa mga namatay tungod sa Dengue sa Davao region ngadto sa 87 percent sa 2019 o 43 gikan sa 23 sa 2018.
Subay sa data gikan sa Department of Health-Regional Epidemiology Surveillance Unit (DOH-RESU) nga sukad Enero hangtud Disyembre 2019, ang kaso sa dengue sa rehiyon misaka sa kinatibuk-ang 8,060.
Sa milabay nga Agosto 2019, una ng gideklara ni Health Secretary Francisco Duque III ang national dengue epidemic tungod sa nagkataas nga kaso niini latas sa nasud.
Sumala pa kang DOH-RESU Davao head Dr. Cleo Fe Tabada, ang dakbayan sa Davao ang nag-una sa adunay pinakataas nga kaso sa dengue nga anaa sa 4,209 ka mga pasyente ug anaa sa 25 ang namatay, gisundan sa Davao de Oro nga adunay 1,363 ka kaso ug duruha ang namatay; Davao del Norte nga adunay 1,121 ka kaso ug pito ang namatay; Davao Oriental nga adunay 890 ka kaso ug tulo ang namatay; Davao del Sur nga adunay 318 ka kaso ug upat ang namatay; ug Davao Occidental nga adunay 69 ka kaso ug duruha ang namatay.
Kung itandi sumala pa sa tuig 2018 nga data, adunay 6,403 dengue patients ug 23 deaths ang natala sa Davao region.
Tungod niini, gipahugtan pa karon sa ahensiya ang “4 O’clock Habit” program aron nga malikayan ang pagpangitlog sa mga lamok ingon pagbungkag sa mga breeding sites niini.
Nanawagan na lamang ang ahensiya nga suportahan ang mga health officials sa higayon nga magpagula kini og advisory sama na lamang sa massive cleaning aron nga mabungkag ang source sa mga lamok.
