DAVAO REGION- Mokabat na sa kapin 1,500 ang ihap sa kadudahan nga mga late registered birth certificates ang nadiskubrihan sa National Bureau of Investigation (NBI) Region XI sa munisipalidad sa Sta. Cruz, Davao del Sur.
Sumala ni NBI XI regional director Arcelito Albao nisaka ang nasampit nga ihap human nga nagpadala ug dugang dokumento ang Sta. Cruz Local Civil Registrar alang sa himuong pag-review.
Subay sa ulahing datos nga gipasa, gikan sa 200, nisaka kini ngadto sa 1,200, ug karon niabot na sa kapin 1,500 nga kini sukad pa niadtong 2014 hangtod 2023 nga mga rehistro sa Civit Registrar sa maong munisipalidad.
Sa karon, aduna na’y resulta sa gipahigayon nga fact-finding investigation sa LGU sa Sta. Cruz ug kini ang ipresenta sa NBI karong Lunes atol sa Senate Hearing.
Una ng nadiskubrihan sa unang imbistigasyon nga adunay 56 sa 58 ka mga birth certificates ang kulang sa supporting documents ug matud pa gimanipyula sa Local Civil Registrar Officer.
Una na sab nga gipaklaro sa ahensya nga ang nasampit nga ihap sa mga birth certificates usa ka orihinal apan, ang sulod niini nga impormasyon ang gidudahan nga binuhat-buhat lamang.
Dugang pa ni Albao nga sa higayon nga kung aduna kini saktong ebidensya, ilahang ipakansela ang mga birth certificates.
Sagad sumala pa sa mga binuhat-buhat nga mga detalye sa birth Certificates ang adunay pangalan sa mga Pilipino nga gituohan kini nga gipaluyuhan sa mga fixers nga ang matag langyaw mibayad sumala pa ug P300,000.
Samtang giangkon sab sa opisyal nga naglisod sila sa pagtumbok karon sa ga nalambigit nga mga langyaw gumikan sa kakulangon sa saktong lokasyon sa ilahang mga nahimutangan sa mga dokumento.
Sa pagkakaron nagtuo ang opisyal nga adunay susama pa nga isgkima sa laing bahin sa nasud.
