DAVAO CITY – Gikatakdang ilubong sa iyang ulahing kapahulayan karong Sabado, Pebrero 4, ang biktima sa hit and run nga si Anna Mae Talili.
Atol sa pakighinabi sa Bombo Radyo Davao, gikanayon sa kinamaguwangang igsuon nga si Anafe nga usa siya ka but-an, maalagaron, ug kugihan nga breadwinner.
Emosyonal nga gipamahayag sa igsuon sa maong dalaga nga si Anafe nga nalipay ang iyang pamilya ug kabanay nga hingpit nang mi-surrender ang suspek nga si Jester Yucosing sa nakalabayng adlaw.
Apan, taliwala niana, duna matud pay mga butang nga gusto ipaklaro ang pamilya ngadto sa drayber ug sa tag-iya sa behikulong nakaligis kang Anna nga giilang si Vice Mayor John Paul Lampig sa Boston, Davao Oriental.
Niangal sab si Anafe sa wala paghatag og update kanila sa mga otoridad mahitungod sa maong kaso.
Hangyo sab ni Anafe sa bise mayor nga magpagawas ug pahayag mahitungod sa iyang kalambigitan sa nahitabong hit-and-run.
Nagpakitabang sab ang pamilya ngadto kang kanhi Pangulong Rodrigo Duterte ug sa pamilya niini nga tabangan sila sa pag-atubang nila sa mga dagkong kalaban.
Gikahibulong sab sa pamilya ang daw matud pa dugay nga pagsurrender sa drayber niini gumikan sa kadugayon sa maong panghitabo kaniadtong Enero 26.
Sa kinaulahian, nihangyo si Anafe ngadto sa drayber nga si Jester Yucosing nga mutug-an na lang sa iyang mga nasayran sa insidente.
via || Bombo LJF
