DAVAO CITY – Pipila sumala pa sa mga local candidates ug City Environment and Natural Resources Office (CENRO) ang padayon karon nga nagtangtang sa mga campaign materials, apan kamatikdan sumala pa nga pipila sa mga materyales ang gipangbiyaan lamang daplin sa mga kadalanan sa dakbayan.
Kini ang na-obserbahan karon sa Interfacing Development Interventions for Sustainability (IDIS).
Sa usa ka pahayag, gikanayon sa IDIS nga natala karon sa grupo ang mga election wastes sa siyudad ilabi na sa Catalunan Pequeno ug Talomo areas.
Gipasabot sa grupo nga ang mga local candidates ug ang ilang clean-up teams, inabagan sa CENRO, ang kinahanglan nga champion sab sa tukma nga pagbahin-bahin ingon man pag-recycle sa nahisgutan nga basura.
Sa milabay nga bulan ang lokal nga kagamhanan nagmando na sa mga kandidato nga limpiyohan ang tanan nga mga election campaign materials sugod Mayo 10 hangtud 12, 2022 kini pinaagi sa Executive Order 15 Series of 2022 nga gilagdaan ni kanhi mayor ug presumptive Vice President Sara Duterte-Carpio.
