DAVAO CITY – Subling nag-apela ang Interfacing Development Interventions for Sustainability kon IDIS sa mga ahensya sa panggamhanan nga nalambigit sa gipasiugdang Samal Island – Davao Connector Project.
Sa gipagawas nga opisyal na pamahayag, gikanayon sa organisasyon nga kabahin sa pag-uswag sa usa ka lungsod ang pagmugna ug usa ka istruktura nga maghatod ug kalambuan sa panginabuhian ug patigayon.
Apan katugbang sa maong proyekto ang posibleng kadaot nga mamahimong hatud niini sa kinaiyahan.
Sa kaso sa Samal – Davao Bridge, gipahayag nga ang pag-uswag mahimong makab-ot nga dili i-kumpormiso ang kinaiyahan, partikular na sa mga coral reefs nga gambalay sa daghang numero sa mga linalang sa ilawom sa dagat.
Gikonsidera sab ang mamahimong kaugmaon sa mga mananagat kon ugaling madayon ang pagtukod sa maong tulay.
Busa, gipanawagan nila ang realignment sa tulay ug ilang gi-aghat ang LGU sa IGACOS ug DPWH nga magbaton ug environmentally-sensitive infrastructure design ug mga maayong lakang aron dili makahimo ug dagkong kadaot sa mga kadagatan.
Ilaha sab gipunting sa maong panawagan nga ang Korte Suprema mismo ang nagkanayon nga usa ang mga tulay sa mga environmentally-critical projects, ug kritikal ang mga coral reefs sa maong proyekto ug angayan sab nga ikonsidera sa lokal nga panggamhanan sa Samal Island.
Nanawagan sab ang organisasyon ngadto sa mga nahisgutang ahensya ug implementasyon sa Environmental Impact Assessment Process, ug ang pagpagawas sa disenyo sa tulay ngadto sa mga katawhan sa Samal Island aron makamugna ug kasabutan niini.
via || Bombo LJ Florendo
