DAVAO CITY – Gihinumdum sa Interfacing Development Interventions for Sustainability kon IDIS ang pagsaulog sa Zero Waste Month ug ang ika-23 nga anibersaryo sa pagkaduso sa Republic Act 9003 kon ang Ecological Solid Waste Management Act of 2000.
Subay sa temang “Zero Waste to Zero Emissions,” pipila ka mga environmental groups ang ligdong nga panawagan nga dili ipadayon ang gilaraw nga Waste-to-Energy facility sa may Biao Eskwela, ning dakbayan gumikan sa posibleng kadaot nga hatud niini sa kinaiyahan.
Gikasugyot sab sa grupo ang lain pang mga pamaagi sa pagpakunhod sa mga basura sama sa recycling, composting, ug ang pagbaton og zero waste lifestyle.
Gipasigarbo sa IDIS ang pipila ka mga inisyatibo sa dakbayan nga gilusad alang sa luwas nga pagpreserba sa kinaiyahan.
Una diha ang Toril Kalambuan Women’s Association nga usa ka grupo sa kababayen-an nga naghimo ug nagbaligya sa mga bag, table mat, flower vase, ug uban pa ng gama sa recyclable materials.
Giila sab ang Bote-Bakal Project sa Mintal Resource Collectors Association gikan sa Barangay Mintal nga naga-buy and sell og mga recyclables gikan sa mga tagbalay ug nagpromotar sa solid waste management.
Kasamtangang gisuportahan kini sa usa ka pribadong kumpanya ug naglusad ug 30 ka mga trabahante ilawom sa maong programa, og nakakolekta sa kinatibuk-an og kapin 75,000 kiliograms sa mga recyclable materials sa nakalabayng tuig.
Samtang ang Limadol, usa ka start-up enterprise nga nangampanya sa zero waste sa mga sanitary landfills ang nagakolekta og mga bahug ug gikan-an sa mga residente sa Brgy. Tacunan aron ipakaon sa mga Black Soldier Flies.
Usa kini nga mananap nga makatabang sa pagmugna ug fertilizers ug pagkaon sa mga binuhing hayop.
Gikanayon ni IDIS Executive Director, Atty. Mark Penalver nga mamahimo sab nga malambigit ang katawhan sa mga kalihukan aron mukunhod ang waste production sa dakbayan apan kinahanglang naka-angkla kini sa Ecological Solid Waste Management Plan sa dakbayan.
Nagpaambit ang buhatan sa katawhan nga musalmot sa ipahigayong OYA Davao Eco Summit karong Hulyo 26 hangtud 27 sa Assumption College of Davao.
Hisgutan sa maong kalihukan ang zero waste practices, ug ang pagbisita sa material recovery facility sa Barangay Mintal, ning dakbayan.
via || Bombo LJF
