DAVAO CITY – Gidawat ni Davao City Mayor Inday Sara Duterte-Carpio ang pagpangayo og despensa ni National Task Force (NTF) Against Covid-19 chief implementer Carlito Galvez Jr. human ang naunang pahayag niini nga ang home quarantine maoy hinungdan sa pagsaka sa kaso sa COVID-19 sa dakbayan butang nga hugtanon sab nga gipanghimakak sa mayor sanglit wala kini gipatuman sa lungsod.
Gawas sa pagpangayo og pasaylo, gipasigarbo ni Galvez ang agresibo nga pagpaningkamut sa siyudad aron nga mapalambo pa ang health system capacity nga kabahin sa coronavirus disease (COVID-19) response.
Gikumpirma sab sa mayor nga nakighimamat na sab kaniya ang DOH-Davao officials human ang iyang nahimong pahayag apan wala na kini mihatag og dugang detalye.
Una na sab nga gibutyag sa mayor nga ang code team magpabilin dinhi sa siyudad karong semanaha aron motabang pag-assist sa COVID-19 response.
Gipasalig sab ni Galvez nga andam kanunay ang task force nga motabang aron nga palig-onon pa ang testing, contact tracing, treatment, isolation ug recovery capacity dinhi sa dakbayan.
