DAVAO CITY – Gibutyag sa Inter-Agency Council Against Trafficking (Iacat)-Davao nga mukabat sa 38 ka kaso sa human trafficking, nga sagad gikalambigtan sa mga minor de edad ang naresolba nga maoy hinungdan sa pagka-kumbikto sa mga suspetsado kalakip na ang 10 ka mga foreign nationals.
Subay sa data nga gipagula ni Peter John Cabanilla sa Department of Justice (DOJ) Regional Prosecution Office (RPO) Davao, nga sukad 2013 hangtud karong panahona aduna nay 135 ka kaso sa trafficking ang naduso sa korte diin pinakadaghan niini ang natala sa dakbayan sa Davao.
Sa nahisgutan nga ihap, 55 ka kaso ang pabilin nga nag-ong ong alang sa ipahigayon nga pagdungog.
Sa 135 ka kaso, kadaghanan niini ang adunay kalabutan sa prostitusyon sa mga minor de edad partikular na ang sexual exploitation nga gikalambigita sa 203 ka mga biktima nga naluwwas gikan sa mga bugaw.
Sa maong ihap, 179 niini ang mga babaye samtang 24 ang mga lalaki.
Kalakip sa mga gireklamo ug nalambigit sa kaso ang usa ka New Zealander nga mipanaw na, tulo ka koreans nga pabiling at large, tulo ka mga amerikano, usa ka British nga adunay pending extradition trial sa Japan) ug duruha ka Japanese.
