DAVAO CITY- Gisiguro sa Davao City Police Office ngadto sa nahibiling kabanay sa biktimang gipusil-patay sa kaipon niini niadtong milabay nga adlaw nga mahatagan gayud og hustisya ang kamatayon sa maong biktima.
Kahinumdumang kini ang adunay kalabutan sa natigayong pagpamusil ni Patrolman Alvin Jhon Tayamin kansang nakadestino sa Mandug PNP, nga miresulta sa kamatayon sa ka-ipon niining si Justine May Villaroja sa Purok San Miguel, Monseda Compund, Brgy. Indangan, ning dakbayan sa dabaw.
Sumala pa sa tigpamaba sa Davao City Police Office nga si Police Captain Hazel Tuazon atol sa pakighinabi kaniya sa Bombo Radyo Davao nga ning kasamtangan gikustodiya na sa kapulisan ang maong suspetsado samtang nagapadayon ang imbestigasyon sa maong panghitabo.
Pagpaklaro pa niini nga ang suspetsado ug biktima ang pulos anaa sa impluwensya sa ilimnong makahubog niadtong tungura diin ang ilahang panaglalis ang miresulta s a maong madugo nga insidente.
Atol sa gihimong inisyal nga imbestigasyon sa kapulisan, matud pa selos ang hinungdan sa maong panghitabo, diin matud pa nagselos kuno ang maong pulis tungod matud pa adunay laing karelasyon ang maong babaye.
Dugang pa ni Tuazon nga atol sa pagresponde sa mga kapulisan sa Mandug PNP, dali kini silang mi-conduct og hot pursuit operation batok sa suspetsado apan sila ang napakyas tungod wala kini sa mao nga crime scene apan matud pa mismong ang suspek ang mitahan sa kaugalingon niini ngadto sa Mandug PNP gumikan na usab sa pag-obliga niini nga mutahan ngadto kanila.
Pagbutyag niini nga gina-andam na usab ang kasong murder nga ipasaka batok kay Tayamin.
Sumala pa nga ning kasamtangan,ginapaabot na lamang ang pagtugot sa kabanay sa maong biktima aron mapailawom sa otopsiya ang patayng lawas niini.
Gisiguro usab niini nga mahatagan og hustisya ang gidangatan sa maong biktima.
Dugang pa ni Tuazon nga dili gayud tabunan sa kapulisan ang maong panghitabo tuod ilaha matud pa nga tabangan ang nahibiling pamilya sa maong biktima aron makuha ang hustisyang gikinahanglan.
