DAVAO CITY – Hustisya ang padayong gipanawagan sa pamilya Talili sa pagkamatay ni Ana Mae Talili, human kining gihatod sa ulahing kapahulayan pasado alas 3 ang takna na sa hapon kagahapon, Pebrero 4.
Sa personal nga pakighinabe sa Bombo Radyo Davao sa igsuon niining si Anafe Talili, nanghinaot sila nga masilotan o ma-priso ang sad-an sa pagligis-patay kang Ana Mae kung diin dili matod pa sila kontento sa impormasyon nga ilahang nadawat gumikan na sab nga wala silay nakita nga CCTV footage nga nagapamatuod nga si Jester Yucosing, 40 anyos, personal driver sa Vice Mayor sa Boston, Davao Oriental ang nag drive sa maong puti nga pick up niadtong higayon sa insidente.
Dugang usab ni ana, mitunol si Vice Mayor John Paul Lampig og P100,000 nga hinabang ngadto kanila, ug mao kini ilahang gigamit pagpalubong sa biktima apan dili gayud kini igo gumikan dili na mabalik ang kinabuhi ni Ana Mae ug dili na mawala ang ilahang nasinatian nga kasakit.
Samtang, dako usab ang pasalamat sa pamilya ngadto kang kanhi President Rodrigo Duterte sa paghatag og reward money nga P500,000 sa saksi nga nakatudlo og impormasyon kabahin sa driver niadtong wala pa kini mitungha.
Gilauman ang pagpasaka ug kaso sa pamilyang Talili karong ugmang adlawa, Pebrero 6, og kaso batok sa driver nga reckless imprudence resulting to homicide, physical injury, ug damage to property.
Sa pikas bahin, posible sab nga mag-atubang og silot sa balaod si Vice Mayor John Paul Lampig tungod sa pagpanag-iya sa maong puti nga pick-up.
Ginahuwat na lamang sa pamilya ang iyang pag-atubang aron matino ang kamatuoran sa kaso.
via | Bombo KMG & Bombo LJF
