Nanawagan karon ug hustisya ang kabanay sa finance manager sa Davao del Norte Electric Cooperative -Cooperative Development Authority (DANECO-CDA) nga gipusil patay kagahapon sa buntag samtang nag-bisikleta sa Maco, Compostela Valley Province.
Una ng giila ang biktima nga si Glenn Maico Ordoño, 46, residente sa Purok 3, Poblacion Maco sa nahisgutan nga lalawigan.
Nahitabo ang insidente sa Sitio Lupon-lupon, Barangay Hijo sa nahisgutan nga lungsod.
Gilayon sab nga miresponde ang kapulisan sa lugar dihang nadawat ang impormasyon ug kumpirmado ang nagbuy-od na nga lawas sa biktima nga naligo sa iyang dugo.
Sa inisyal nga imbestigasyon, duruha ka mga lalaki nga sakay sa motorsiklo ang mipusila sa biktima.
Gikanayong ang backride sa naka-motor ang mipusil kang Ordoño dayon paspas kini nga misibat palayo sa lugar.
Sa kasamtangan, gipalawman pa sa otoridad ang ilang imbestigasyon aron nga masayran ang motibo ug mipaluyo sa krimen.
Gikanayong ayha nahitabo ang insidente, naka-post pa si Ordoño ug cryptic messages sa social media account nga nagkanayong bisan nga nasayod ka sa kamatuoran, mas pili-on na lamang ang magpakahilum gumikan kay kung ipatigbabaw sumala pa ang baruganan mamahimo nga patyon.
Nanghinaut na lamang ang kabanay sa biktima nga masikop ug manubag ang mga mipaluyo sa krimen.
