DAVAO REGION- Giduso karon sa Department of Transportation (DOTr) ang nagkadaiyang transport infrastructure projects sa Mindanao aron nga mapaspasan ang paglambo sa rehiyon.
Sumala kang Transportation Secretary Jaime Bautista, dako ang matabang sa hapsay nga sistema sa transportasyon sa pag-uswag sa ekonomiya sa Mindanao.
Atol sa iyahang pamahayag sa 1st Mindanao Infrastructure Summit sa dakbayan sa Davao, gihatagan ug pagtagad ni Secretary Bautista ang kamahinungdanon sa sustainable ug inclusive development sa Mindanao.
Lakip sa mga proyekto mao ang modernisasyon sa Laguindingan Airport.
Gikatakda sab nga ipailawom sa modernisasyon ang mga tugpahanan sa Mati, M’lang, Jolo, Siargao, Tandag, Bukidnon, ug Zamboanga.
Samtang sa laing bahin, pagasugdan na usab ang Davao Public Transport Modernization Project nga ang tumong aron mapahapsay ang public transport system sa Metro Davao.
Kapin sa 600 kilometros nga lanes nga eksklusibo pkini alang sa mga bus, lakip ang mga electric bus, modern jeepney, ug uban pang matang sa publikong sakyanan sa dakbayan sa Davao.
Dugang pa sa kalihim nga sa modernization program, mas mapakusgan pa ang turismo ug ang paglambo sa ekonomiya sa nasampit nga mga lugar ilabi na dinhi sa Davao region.
