Gipasabot sa Korte Suprema nga mahimo pa gihapon magduso og mosyon ang House of Representatives (Kamara) aron iparepaso ang ilahang gipagawas nga bag-ong resolusyon.
Kini mismo ang gipahayag ni Supreme Court Spokesperson Atty. Camille Sue Mae Ting, pagkahuman sa deklarasyon nga ‘unconstitutional’ ang ‘articles of impeachment’ batok ni Bise Presidente Sara Duterte.
Matod ni Ting, adunay higayon ang ubos balay balauranan sa Kongreso nga magsumite og ‘motion for reconsideration’ ngadto sa Korte Suprema kabahin sa maong desisyon.
Bisan pa man kini giisip nga ‘immediately executory’ o diretsong ipatuman, posible gihapon nga buhaton kini sa House of Representatives aron mapadayag sa korte ang ilahang bahin.
Kahinumduman nga gisibya ni Atty. Camille Ting nga ang Supreme Court nagdeklara nga supak sa Konstitusyon ang impeachment complaint batok sa ikaduhang pangulo sa nasod.
Kalabot niini, nakabutang sa desisyon sa Korte Suprema ang mga basehan sa ilahang paghatag sa maong ruling.
Subay sa desisyong gibotohan sa mga mahistrado, ang paglapas sa ‘1-year rule’ ug sa ‘right to due process’ maoy rason nga giisip nga unconstitutional ang articles of impeachment.
Nagkahiusa ang mga mahistrado sa ilahang desisyon nga 13 ang pabor, wala’y misupak, ug duha ang nag-inhibit.
Tungod niini, dugang pa nga gipatin-aw ni Atty. Camille Sue Mae Ting ang posisyon sa Korte Suprema bahin sa paglapas sa ‘1-year ban rule’ sa pagsumite og impeachment complaint batok sa usa ka opisyal sa gobyerno.
Usa pa sa giingong basehan sa Korte Suprema mao ang pagpasa gilayon sa impeachment complaint nga wala moagi sa hustong proseso o ‘due process.’
Busa ang maong articles of impeachment gibasura ug gideklarang walay bisa sa Korte Suprema pinaagi sa deklarasyon nga ‘unconstitutional’ ang reklamo batok ni Bise Presidente Sara Duterte.
