DAVAO CITY – Nanawagan ang usa ka konsehal ning siyudad sa hinanali nga pagmugna og north ug south bound bus terminals isip solusyon sa nagpadayon nga paghuot sa Davao City Overland Transport Terminal (DCOTT).
Sumala pa kang konsehal Conrado Baluran, committee chairperson on transportation and communication, nagpalabang og resolusyon ang City Council alang sa pagmugna sa north ug south bound terminals kaniadtong 2018.
Ilalom sa ordinansa, kinahanglan nga ang itukod nga terminal adunay minimum land size nga usa ka ektarya ug maximum area nga lima ka ektarya.
Gitataw ni Baluran nga ang mga areas nga gikonsidera alang sa south bound terminal ang gilangkuban sa Puan ug Toril nga mamahimong maka-cater og mga pasahero nga paingon ug pabalik gikan sa North ug South Cotabato; ug ang Catalunan Paqueno alang sa Bukidnon ug Cagayan de Oro nga pasahero samtang ang Buhangin area ang sa north bound diin maka-cater kini ug mga pasahero gikan sa Mati sa Davao Oriental, Butuan sa Surigao del Norte, ug uban pang northern part sa siyudad.
Sa kasamtangan, nangita pa ang lokal nga panggamhanan ug mga investors alang sa pagtukod sa nahisgutan nga satellite terminals.
