DAVAO CITY – Sama sa gisaad nga tabangan ang mga drivers ug operators nga maapektohan sa ipatuman nga transport modernization program, gihan-ay na sa lokal nga panggamhanan ang social compensation packages ilalom sa High Priority Bus System (HPBS).
Mamahimo na matud pa karon nga maka-avail ang mga drivers ug operators sa bisan unsa mang lima ka mga social compensation packages nga gitanyag sama sa educational assistance, skills training ug cash-for-work assistance.
Sumala pa kang HPBS spokesperson Norman Baloro nga matag jeepney driver ug operator mamahimong makapili sa lima ka mga packages nga gitanyag.
Gikanayong ang lima ka packages gitanyag sa mga programa sa Department of Labor and Employment (DOLE), Department of Trade and Industry (DTI), Technical Education and Skills Development Authority (TESDA), Commission on Higher Education (CHED), ug Department of Health (DOH).
Ilalom sa DOLE program, ang mga driver ug operator mamahimong maka-avail sa usa ka bulan nga cash-for-work program ug bayaran kini og P11,000.
Gawas pa kini sa financial assistance nga ihatag alang sa mga nahisgutan.
Mitanyag sab ang DTI og livelihood kits aron nga mamahimong entrepreneurs ang mga nahisgutan.
Samtang sa bahin sa TESDA, mitanyag ang ahensiya og nagkadaiyang skills training diin nag-unang prayoridad niini ang NC3 level course alang sa bus driving ug uban pang automotive related courses.
Mitanyag sab ang CHED og four-year course education grant nga P15,000 matag tuig sulod sa upat ka tuig sa usa lamang ka benepisiyaryo sa driver o operator.
Samtang sa health assistance, ang beneficiary mamahimong makakuha og PhilHealth, Lingap, Malasakit Center diin ang DOH motahag og dugang P5,000 ngadto na P10,000 isip medical assistance.
Kahinumduman nga ang HPBS ang usa sa mga tubag sa nagkagrabe sumala pa nga traffic sa dakbayan diin mahatagan na matud pa kini og kasulbaran sa higayon nga mapatuman.
Laraw sab niini nga mahatag ang sustainable og komportable nga public transportation alang sa tanan.
Una na sab nga gibutyag ni Norman Baloro, HPBS Social development program committee in charge nga gihimo nila ang dayalogo sa mga drivers ug operators aron nga mapasibaw sa mga nahisgutan ang ilang mga mulo.
Gawas sa dayalogo sa milabay nga semana, magpahigayon og ikaduhang hugna ang ahensiya ayha hingpit nga sugdan ang transport modernization program.
