DAVAO CITY – Ginalihok na sa lokal nga panggamhanan sa Davao City ang ayuda nga ihatag ngadto sa probinsya sa Davao de Oro nga kasamtangang nakasinati og pagbaha human sa pagtay-og sa linog sa halos tibuok probinsya.
Gikanayon ni Committee on Finance, Ways and Means and Appropriations Chairperson ug Davao City 3rd District Councilor Myrna Dalodo Ortiz, makigkoordina ang LGU sa Davao City Disaster Risk Reduction Management Office alang sa gikinahanglang rekomendasyon nga mamahimong ipadangat sa committee of finance sa city council.
Dugang pa sa konsehal nga usa sa mga pre-requisites sa paghatag og financial aid sa usa ka probinsya gikan sa city council, mao ang pagdeklara og state of calamity.
Kahinumduman nga unang gideklara ang state of calamity sa mga lungsod sa New Bataan ug Maragusan human sa pagtay-og sa linog kaniadtong Marso 7, samtang bag-uhay lamang nga gideklara nga nasa state of calamity ang probinsya sa Davao de Oro kaniadtong Marso 11 human sa sunod-sunod nga aftershocks ug sa nagpahinabong pagbaha gumikan sa kusog nga ulan sa probinsya.
via || Bombo LJF
