DAVAO CITY – Hinay-hinay na matud pa karon nga milambo ang hilit nga dapit sa Paquibato District nga kanhi gikotahan sa mga komunistang grupo kini human nga nagpadayon karon ang pagtukod og imprastraktura ug gani sa nahisgutan nga dapit sab plano nga itukod ang University of Southeastern Philippines (USEP) partikular na sa Barangay Malabog.
Sumala pa sa Eastern Mindanao Command (EastmMinCom), makonsidera ang maong lakang nga dakong kalambuan ug matawag nga “victory of peace”.
Sumala pa kang EastMinCom Public Information Office (PIO) chief Lieutenant Ezra Balagtey, ang nahisgutang kalamboan mohatag sa mga Indigenous Peoples (IPs) og access paingon sa quality education nga maoy ugat nganong mipatigbabaw ang komunista sa lugar sa milabay nga mga tuig.
Una ng gibutyag ni Davao City Mayor Sara Duterte-Carpio nga mo-alokar ang lokal nga panggamhanan og P54 million alang sa pagtukod sa USEP annex building diin maggikan ang pundo niini sa 2020 annual budget sa siyudad.
