DAVAO REGION- Nadakpan sa hiniusang pwersa sa mga kasundaluhan ug kapulisan ang giila nga high ranking leader sa mga rebelde atol sa operasyon.
Giila ang dinakpan nga si Porferio Tuna, Jr. alias Danny/Ampong/Ka Simon, nga agsilbing 2nd Deputy Secretary ug miyembro sa Executive Committee sa Southern Mindanao Regional Committee sa communist terrorist group.
Nasikop ang nahisgutan sa Purok Magkidong, Barangay Mankilam, Tagum City, Davao del Norte.
Sumala pa sa mga otoridad nga si Ka Simon ang gilambigit sa daghang mga ngil-ngig nga mga krimen.
Apil na niini ang usa ka ambush niadtong Hulyo 10, 2014, sa Barangay Anitapan, Mabini, Davao de Oro nga miresulta sa pagkamatay sa duha ka enlisted personnel ug pag-atake sa 60th Infantry Battalion sa Barangay Gupitan, Kapalong, Davao del Norte nga miresulta sa pagkamatay sa usa ka opisyal.
Nag-atubang sab kini ug daghang mga kaso nga kriminal lakip niini ang pagpatay, kidnapping, serious illegal detention, robbery with violence, ug attempted homicide.
Kahinumduman nga nabilanggo na kaniadto si Tuna Jr. sa Davao del Norte Provincial Jail ug gitugotan nga makapiyansa kaniadtong 2016 aron moapil sa negosasyon sa kalinaw tali sa Gobyerno sa Pilipinas ug sa National Democratic Front Panel sa Oslo.
Apan paghuman sa negosasyon, wala na kini nagpakita pag usab aron atubangon iyang mga kaso sa korte.
Mapasalamaton sab si Major Allan D. Hambala, Commander sa 10th Infantry (Agila) Division, sa hiusang pagpaningkamot sa mga Agila troopers ug sa uban pang law enforcement agencies, alang sa pagkadakop ni Tuna Jr. gipahayag sab niya nga usa kini ka dakong pag-igo sa liderato sa mga communist terrorist group sa Southern Mindanao.
