DAVAO CITY – Patay ang usa ka high-ranking Communist Terrorist Group (CTG) leader atol sa nahitabong engkwentro sa rebeldeng grupo tali sa tropa sa 67th Infantry Battalion ilalom sa 701st Infantry Brigade kagahapon sa Sitio Dam, Brgy Guinahalinan, Barobo, Surigao Del Sur.
Sa gipagula nga pahayag gikan kang Captain Mark Anthony Tito, hepe sa Division Public Affairs Office sa 10th Infantry Division, Philippine Army, nasayran nga ang maong engkwentro ang milungtad og 20 minutos diin miresulta sa diha-diha dayong kamatayon sa usa ka Arnold C. Ornales alyas Ka Jorlan, NPA leader sa pipila ka mga nahabilin gikan sa na-dismantle nga Guerilla Front 14.
Narekober sa maong lugar ang usa ka M4 rifle, mga bala ug uban pang kagamitang panggubat ug personal nga mga kagamitan sa namatay nga lider.
Sa pikas bahin, mipaabot og pahasubo ngadto sa pamilya ni Ka Jorlan si 10ID Commander MGen Nolasco Mempin.
Nanawagan na lamang ang opisyal ngadto sa ubang miyembro sa Communist Terrorist Groups nga mu-surender na ug mubalik na sa sabakan sa gobyerno.
