DAVAO CITY – Emosyonal nga niatubang si Davao City Police Office Director PCol Alberto Lupaz human sa kamatayon sa duha ka mga sakop sa Pulis Calinan nga napatay sa nahitabong kagubot sa may Purok 4, Lower, Barangay Lacson, Calinan, ning dakbayan niadtong adlawng Miyerkules.
Sumala pa sa opisyal, dungan sa ilang pagpanubay sa kamatayon sa ilang mga kaubanan nga sila PCMS TITO DIDAL LAGUE ug PCPL MARK ANTHONY ELMAN CORSINO, dili sila muhunong sa paghatag og hustisya ingon man pagtabang sa nabiyaang pamilya.
Hugtanong gikondena sa DCPO ang nahitabong kamatayon sa duha ka mga pulis. Dugang niana nga ang maong makasubong panghitabo ang subling nagpahinumdom sa tanang risgo ug sakripisyo nga ilang giatubang alang sa kaluwasan sa katawhan.
Mas magtukmod pa kini sa kapulisan nga ipadayon ang ilang dedikasyon sa pagpanalipod sa katawhan.
Mihatag ug hinabang pinansyal si Col. Lupaz sa mga pamilya sa mga pulis diin personal nga gitunol ang salapi nga silbing mortuary assistance.
Wala sab gikabutayag kung pila ang kantidad nga gihatag sa mga pamilya.
Nasayran nga usa sa mga pulis nga nakabsan sa kinabuhi nga si PCMS Lague ang gikatakda untang moretiro karong Disyembre sa iyang pagserbisyo sulod sa pipila ka mga katuigan sa PNP nga gikasubo sab kini sa kaubanan sa Calinan Police Station ug sa DCPO.
