DAVAO CITY – Patay ang usa ka helper human nahulog ug nalatayan sa dump truck nga iyang gisakyan niadtong Hulyo 24, adlawng Domingo, sa may Purok 8, Barangay Buda, Marilog District, Davao City.
Sa report nga gipagawas sa Marilog PNP, giila ang biktima nga si Rolando Palacio Awit, 25 anyos, lumulupyo sa nahisgutang dapit.
Samtang ang truck nga nakalatay kaniya ang gimanehoan ni Jerome Olaco Lodovice, 27 anyos, taga Sitio Marahan,Barangay Marilog ning dakbayan.
Gipanag-iyahan ang maong truck sa Mitz Construction and Supply.
Subay sa imbestigasyon sa kapulisan, gihagad sa driver ang biktima nga mosakay na lamang sa front seat sa truck apan mibalibad kini, inay ang iyaha na lamang asawa ug anak nga lalaki ang gipasakay sa front seat ug siya ang misakay sa luyo sa truck.
Apan pagsubay nila sa libaong ug lapukon nga bahin sa kalsada sa Purok 8, nawad-an kini og balanse ug aksidente nga nahagbong ang biktima ug nalatayan kini sa ligid sa truck.
Mitahan na sa kapulisan ang driver sa maong truck nga anaa karun sa kustodiya sa Marilog Police.
Kasamtangang gipahiluna ang patay’ng lawas ni Awit sa usa ka punerarya sa Calinan ning syudad.
Via || LJ Florendo
