DAVAO CITY – Gihatud na sa ulahing kapahulayan si Sheila Lagsaway kinsang kumpirmadong gipatay sa iyang amo nga si Nenita Pagatpatan niadtong Hunyo 17 sa Deca Homes, Cabantian, Davao City.
Napuno sa pagdanguyngoy sa iyang mga pamilya ug paryente ang lubong sa 29 anyos nga babaye nga nahitabo sa Sitio Kibatang, Brgy. Dalupan, Don Marcelino, Davao Occidental.
Dungan niini, hiniusang nanawagan ang mga nagmahal kang Shiela og hustisya sa makasubong gidangatan sa iyang kinabuhi.
Pipila ka adlaw una pa ang nahitabong paglubong kang Lagsaway, gikumpirma sa 70 anyos nga si Pagatpatan nga siya ang nagpatay sa biktima.
Subay sa kompirnasyon sa Davao City Police Office, nakonsensya ang idaran hinungdan nga nga walay pagduha-duha nga giangkon niini ang nahisgutang krimen.
Narecover sa SOCO ang 2×3 nga coco lumber nga adunay gitas-ong usaka pye nga maoy gigamit ni Pagatpatan sa pagbunal sa ulo sa biktima, ug ang celfon usab sa biktima, atol sa pagsulod sa balay sa suspek sa Block 9, Lot 6, Deca Homes, Cabantian, ning dakbayan.
Sumala ni DCPO Spokesperson PCapt. Hazel Tuazon, niangkon mismo ang suspek nga gibunalan niya ug kahoy ang ulo sa biktima samtang namisbis kini og bulak sa tugkaran niadtong Hulyo 17.
Gipaklaro sab sa DCPO nga wala nadunggaban ang biktima apan ang mga samad niini sa lawas ang nagpamatuod sa kakusog sa impact sa paghampak ni Pagatpatan ngadto sa biktima.
Kahinumduman nga nakaplagan ang nakabalot sa trapal nga patayng lawas ni Lagsaway niadtong Hunyo 18, bandang alas 6:30 buntag sa Block 20, Lot 44, Deca Homes, Cabantian o mga 20 metros ang gilay-on gikan sa balay sa suspek.
Kumpirmado sab nga siya ang nigawas sa CCTV footage nga nagguyod kang Lagsaway human siya gipatay.
Gipasakahan na og kasong murder ang idaran nga kasamtangang gikustodiya sa Buhangin Police.
via || Bombo LJF
