Gitugtan sa International Criminal Court (ICC) Pre-Trial Chamber ang hangyo sa Prosecution nga palugwayan ang deadline sa pagpanghatag sa mga arrest warrant ug sa pagpaila sa mga saksi sa kaso batok kang kanhing Pangulong Rodrigo Duterte nga adunay kalabotan sa crimes against humanity.
Sa lima ka pahinang desisyon nga gipagula ni Presiding Judge Iulia Antoanella Motoc, gimanduan ang Prosecution nga makompleto ang maong mga dokumento hangtod sa Hulyo 1, 2025.
Kauban niini, gimanduan usab ang Prosecution nga magsumite sa bisan unsang aplikasyon alang sa redactions, non-disclosure sa identity sa mga saksi, o non-disclosure sa tibuok ebidensya.
Ang Victims and Witness Unit usab gimanduan nga magsumite sa ilahang obserbasyon kabahin sa maong aplikasyon hangtod sa Hunyo 16. Una nang nagsumite ang Prosecution sa ilahang hangyo alang sa extension isip pag-ila sa katungod sa kanhing presidente sa nasod.
