Gibasura sa International Criminal Court (ICC) ang apela sa Israel nga wad-on ang arrest warrants batok kang Israeli Prime Minister Benjamin Netanyahu ug kanhing defense chief Yoav Gallant, nga adunay kalabotan sa mga alegasyon nga krimen sa gubat ug krimen batok sa katawhan sa Gaza.
Gibalibaran usab sa ICC ang hangyo sa Israel nga suspendihon ang imbestigasyon kalabot sa giingong mga kalapasan ug sa mga pagpanamastamas batok sa mga Palestino.
Giakusahan ang Israel sa pagpamatay o genocide tungod sa padayon niining opensiba batok sa grupo nga Hamas sa Gaza sukad pa niadtong Oktubre 2023.
Base sa datos sa Gaza Health Ministry, kapin sa 58,000 ka mga Palestino na ang namatay tungod sa mga nahitabong gubat. Padayon usab nga misamot ang krisis sa humanitarian nga kahimtang sa maong lugar.
