COMPOSTELA, DAVAO DE ORO – Patay ang usa ka gwardya sa usa ka bangko human nga gipusil sa wala mailhing tulisan pasado alas otso ang takna kaganihang buntag.
Sa report sa kapulisan, giila ang biktima nga si James Pamasirsan Crucio, 24 anyos, Security Guard sa BDO Network sa Compostela Branch.
Sa inisyal nga imbistigasyon, sumala sa Compostela MPS nga nagkuha og cash ang taga BDO sa Mabuhay Enterprise, pasado alas otso kaganihang buntag, apan kalit lamang nga gitulis ang mga empleyado sa Banko.
Sumala pa ni Lt. Col. Jesser Vagilidad, nga paggawas na sa nasampit nga tindahan ang gwardya ug teller sa banko, apan, kalit usab nga migawas ang duha ka mga armadong suspetsado ug nagdeklara og hold-up.
Misukol sumala pa ang guardiya ug nag-ilog pa sila sa shotgun sa guardya apan gipusil sa usa pa ka suspek ang biktima ug naigo siya sa dughan. Gidala usab sa duha ka mga suspek nga naka bonnet ang shot gun sa gwardya. Nasayran nga mokabat sa P3.6 Milyon nga cash ang nadala sa mga tulisan.
Dugang pa sa mga otoridad, yano lamang nga nagbaktas ang mga suspek pasakay sa ilahang motorsiklo nga nakaparking sa unahan nga misibat padulong sa Monkayo. Nasayran nga nibalhin sa usa ka SUV ang mga suspetsado. Sa karon nagpadayon ang hot pursuit operation sa mga kapulisan samtang gina-review na karon kuha nga CCTV footage sa maong panghitabo.
