DAVAO CITY – Nagkagubot sa usa ka kan-anan sa may Bankerohan ning dakabayan bandang ala-una y media sa kaadlawon, Dominggo, Mayo 19.
Sa kuha sa netizen, tataw ang pagbinundakay, binunalay ug pagsinumbagay sa mga kalalakin-an sa Paz Eatery nga gidagsa sa mga tawo bisan pa sa kaadlawon.
Nagkatag ang buak nga mga plato, lamisa ug uban pang hinagiban nga resulta sa bikil sa mga lalake sulod sa kan-anan.
Ginakuhaan pa og detalye ang maong kagubot apan, sumala pa sa mga nakasaksi, nabikil kuno ang usa ka grupo sa mga lalaki nga naa sa pikas lamesa, batok sa grupo sab sa mga lalaki nga naa sa pikas lamesa.
Duna sab gikanayon nga nasamok ang grupo sa usa ka lamesa gumikan sa usa ka binabaye nga miresulta sa pagpinusposay sa mga botelya.
Padayon sab nga gipangita sa San Pedro Police Station ang mga nalambigit sa maong kagubot.
Gipasalig sab sa Davao City Police Office nga dunay ipangmuntar nga force multiplier ang maong lugar gumikan sa pagdagsang sa mga tawo panahon sa kaadlawon.
Naglusad sab ang DCPO og imbestigasyon sa nasampit nga panghitabo.
