DAVAO CITY – Walay natalang casualty ingon man na-injured sa nahitabong pag-ulbo sa grass fire sa Puting Bato Peak sa Island Garden City of Samal (Igacos), Davao del Norte.
Una ng gibutyag ni BFP-Davao Public Information Service chief Fire Inspector Lei Anne Palermo, natala ang sunog sa P-6, Puting Bato Peak sa Barangay Guilon, Samal District.
Nagsugod kini pasado alas sais sa gabie ug nadeklara nga fireout bandang alas diyes na sa gabie.
Gitataw sab sa fire official nga walay natala nga casualties ug nasamdan ingon man walay propedad usab nga nadaut. Subay sa inisyal nga imbestigasyon, miulbo ang sunog gumikan sa gibiyaan nga sinugnod.
Wala pa sab masubay karun sa kabomberohan kung pagpasagad sa tawo ang nahimong hinungdan niini.
Una na sab nga gibutyag sa nahisgutan nga sa 1,005 ka mga natala nila nga sunog sa rehiyon sukad 2021, anaa sa 262 o 26.06 percent niini ang grass fire.
Nanawagan na lamang ang kambomberohan sa publiko nga likayan ang pagbilin ug kupos sa sigarilyo o bisan unsa man nga mamahimong hinungdan sa pagkatag sa kalayo panahon nga anaa sa mga lugar nga daghan ug sagbot arun nga malikayan ang susama nga disgrasya.
