Gipahigayon sa kadalanan sa San Pedro Street sa Dakbayan sa Davao, ang usa ka pasundayag nga Banda Dasig, Mugna ug Parada sa Pasko Fiesta kagahapon sa hapon, Disyembre 15, 2024.
Gisugdan kini pinaagi sa usa ka parada nga migikan sa dalan sa Roxas Avenue padulong sa San Pedro St., gilangkuban kini og pipila ka mga pasundayag diin adunay mga float parade, mga nagkadaiyang grupo nga nag sul-ob og mga maanindot nga mga Christmas costume, adunay sab mga performers ug mga musicians nga nagpadangat sa ilahang mga talento, aron lingawon ang mga buot mubisita ug mulantaw sa ilahang mga ginapresenta ngadto sa publiko.
Aron sab nga mamahimo nga hapsay ug malinawon ang pagpahigayon sa maong pasundayag, temporaryo nga gisirad-an ang pipila ka mga kadalanan ning dakbayan susama sa dalan sa Roxas Avenue, CM Recto Avenue, Bonifacio, Iñigo Street ug San Pedro Street.
Nagpabilin sab nga nag-igmat ang mga sakop gikan sa Davao City Police Office, diin nahimo sab nga nagmalampuson ang maong aktibidad ug kalihukan nga walay natigayong mga kaguliyang kon kagubot nga nahitabo.
Nagpasalamat sab ang pipila ka mga residente dinhi sa dakbayan, gumikan nabati sab sumala pa nila ang kalingaw diin makita niini sa ilahang dagway nga nalipay gayud sila sa ilahang mga nakita.
Nahuman ang maong pasundayag ug aktibidad nga hapsay ug tanan nga nangalipay sa maong kalihukan.
