DAVAO CITY – Patay ang usa ka 14 anyos nga estudyante human nga naghikog gumikan gikasab-an matud pa kini sa iyang magtutudlo sa Tagum City.
Giila ang biktima nga si Joseph Masingcap, Grade 7 student sa Canocotan National High School ug nagpuyo sa Purok 6-A, Canocotan, Tagum City.
Subay sa taho gikan sa Tagum City Police Station, nag-inusara lamang matud pa ang biktima sulod sa ilang balay ug naghikog gamit ang pisi.
Milungtad sumala pa og pipila ka oras una paman nga nadiskubrehan ang biktima busa wala na kini naluwas pa.
Ginaingon nga una paman nagpakamatay ang biktima, gikasab-an matud pa kini sa iyang magtutudlo gumikan nakabuak kini og samin sa ilang eskwelahan.
Subay niini, wala pa mihatag og pamahayag ang nahisgutang magtutudlo o ang tulunghaan kalabot sa nasangpit nga panghitabo.
