DAVAO CITY- Mipatim-aw si Police Regional Office 11 (PRO 11) Director Brigadier General Nicholas Torre sa Sanguniang Panglungsod dinhi sa dakbayan sa Davao kaganihang buntag atol sa sesyon sa mga konsehal.
Atol sa iyahang pagpamulong, gipaklaro niini nga ang headquarters sa Philippine National Police (PNP) maoy nagmando nga pulihan si Police Colonel. Lito Patay ug Police Colonel. Sherwin Butil.
Gipaklaro usab sa opisyal nga wala kini nahimo sa desisyon gumikan aduna ma’y mas labaw pa kaniya sa Camp Crame ug kini ang ilahang pagbuot.
Kahinumduman nga una ng gibutayag ni Konsehal Luna Acosta ang dakong supak sa balaod ang gihimo sa kadagkoang opisyal sa han-ay sa kapulisan ang pagpili ug City Director sa kapulisan nga walay pagkonsulta sa Mayor.
Kahinumduman usab nga niadtong nakalabay nga semana nahimong kontrobersiya ang pagpuli sa tulo ka mga DCPO Director sulod lamang sa usa ka adlaw ug karon gidumalaan ni Police Colonel Hansel Marantan.
Ning kasamatangan, buot sab karon ni First District Councilor Acosta nga mabalik sa syudad ang disinuybi ka mga opisyal nga gipang-relieve ug gibalhin sa nagkadaiyang bahin sa rehiyon.
Giduso karon sa chairperson sa Committee on Peace and Order dinhi sa dakbayan ang petition alang sa pagbalik sa katungdanan sa mga opisyal sa ilahang tagsa-tagsa ka mga gidumalaan nga mga kwerpo sa kapulisan dinhi sa dakbayan.
