Gipailawom na sa psychosocial first aid sa Department of Social Welfare and Development (DSWD) Region 11 ang lima ka mga menor de edad human kini maluwas sa giingong operasyon sa sex hub nga gipahigayon sa National Bureau of Investigation (NBI) Region 11 niadtong Hunyo 3, 2025.
Sumala ni Assistant Regional Director Gemma dela Cruz sa DSWD 11, gilayon nga gihatagan og hustong atensyon ug gipaestorya sa temporaryong shelter ang mga bata human kini giturn over gikan sa NBI.
Giila ang mga bata nga biktima sa Online Sexual Abuse or Exploitation of Children (OSAEC) nga karon giatiman na sa mga social worker ug mga eksperto sa mental health aron matabangan sila.
Gisiguro sa mga opisyal nga luwas na karon ang kahimtang sa mga biktima ug gihatagan og proteksyon batok sa posibleng psychological trauma.
Base sa inisyal nga impormasyon sa imbestigasyon, ang mga bata nag-edad og 14, 11, ug 4-anyos nga mga anak sa magtiayon nga giilang suspek sa maong kaso.
Usa niini babaye samtang duha ang lalaki.
Lakip usab sa mga naluwas mao ang duha pa ka babaye nga nag-edad og 11 ug 9-anyos, nga giingong mga pag-umangkon sa maong magtiayon.
Gipahibalo sa NBI nga padayon ang ilang imbestigasyon sa kaso ug andam silang pasakaan og kaso ang mga responsable aron mapanagot sa balaod.
Gipasabot usab sa ahensya nga gipalig-on pa ang ilang kampanya batok sa OSAEC pinaagi sa pakig-alayon sa lokal nga gobyerno ug mga organisasyon nga nagtan-aw sa katungod sa kabatan-onan.
