DAVAO CITY – Human ang pag-abli sa gipalapdan nga 650-meter concrete nga Governor Miranda Bridge II sa Tagum City, laoman sumala pa nga molambo pa ang sektor sa agrikultura sa Davao del Norte ingon man sa mga kasikbit nga probinsiya sa Davao Oriental ug Compostela Valley.
Ang bag-ong tulay magsilbi sumala pa nga alternatibong rota sa 61 anyos nga Old Governor Miranda Bridge.
Kahinumduman nga gipangunahan mismo ni Pangulong Rodrigo Duterte ang inagurasyon sa maong tulay nga gisugdan sa milabay nga Arroyo ug Aquino administrations.
Kauban ni Pangulong Duterte si Department of Public Works and Highways (DPWH) Secretary Mark Villar ug Davao del Norte Governor Anthony Del Rosario.
Mipasalig si Pangulong Duterte nga paningkamutan sa iyang administrasyon ang pagpatuman ug infrastructure projects aron nga mas molambo ang ekonomiya sa nasud ayha matapos ang iyang termino sa tuig 2022.
Naglaom sab ang Pangulo nga unta molungtad pa ug dugang 50 ngadto na sa 70 ka tuig ang bag-ong tulay.
Nasayran nga gisugdan ang pagtukod niini sa DPWH kaniadtong 2004 nga nahimutang sa Daang Maharlika crossing Libuganon River ug gipalapdan kini paglabay sa onse katuig ayha nakompleto kaniadtong milabay nga Abril 21 ning kasamtangan nga tuig uban ang pundo nga P757.01 million.
