DAVAO CITY – Gihaya na karon sa ilang pinoy-anan ang usa ka hamtong lalaki human pusila samtang nagtan-aw lamang sa dulang billiard sa terminal sa dakbayan sa Digos.
Naila ang napatay nga usa ka Regie Trocio Juarez, hamtong ang pangidaron, ulitawo, residente sa Sambak, Barangay Kiagot, dakbayan sa Digos.
Nasayran nga mga alas 7:45 ang takna sa kagabhi-on samtang galantaw lamang ug dulang billiard ang biktima sa Digos terminal, kalit na lamang nga midoul ang wala maila nga suspetsado ug gipusil ang biktima gamit ang .45 nga kalibre sa armas tumong sa ulo nga bahin hinongdan nga nahagba ang biktima.
Gi-usban pa gayud kini sa pagpusil sa makaduha ka higayon, hinongdan nga gi-deklara nga patay paghi-abot sa Davao del Sur Provincial Hospital.
Tulo ka mga baseyo ug usa ka balinis nga iya sa .45 nga pistola ang nakuha gikan sa crime scene. Nakuha sab sa bulsa sa biktima ang kwarta nga mokabat ngadto sa kwatro mil ka pesos.
Sa dugang imbestigasyon sa kapolisan sa dakbayan sa Digos nasayran nga ang biktima nga si Regie notado nga kawatan sa Sta. Cruz, Davao del Sur, lakip na sa sitio Sambag, Barangay Kiagot, Digos City.
Nasayran nga nabalhug na sab kini sa bilanggo-an Digos City PNP.
Padayon pa ang dugang imbestigasyon sa kapolisan, gumikan kay wala’y nakaila sa suspetsado nga mipusil-patay sa biktima.
