DAVAO CITY – Posibleng ang pagsunog sa electrical wiring ang hinungdan sa nahitabong sunog sa Barangay 21-C ug 22-C, Piapi Boulevard, Davao City niadtong Sabado sa udto, Pebrero 25, nga gikatupok sa 1,200 ka mga kabalayan.
Sumala ni Senior Fire Officer IV Ramil Gillado sa Davao City Fire District, nga sigon sa ilang inisyal nga imbestigasyon, nagkanayon ang usa ka saksi nga dunay pipila ka mga menor de edad ang misuway sa pagdaub sa electrical wiring gikan sa usa sa mga balay sa lugar aron manguha og bronse nga kable.
Apan kasamtangan pa kining ginaberipika sa Fire Department sa dakbayan. Dugang pa sa opisyal, misaka sa Task Force Alpha ang maong sunog nga nagpatawag sa tanang fire stations sa dakbayan lakip na medical teams aron muresponde sa mikatag nga kalayo sa mga kabalayan sa lugar.
Usa sab sa mga suliran sa pagresponde sa kabumberohan ang hilit nga dalan nga gikalisdan sa pagpalong sa kalayo.
Gideklarang fire-out ang nadaub nga lugar sa alas-5:21 ang takna sa kahapunon.
Una nang gikumpirma sa BFP Davao nga mukabat sa gibana-banang P9 million ang natalang damyos sa sunog, ug kasamtangan pang ginasusi ang kinatibuk-ang damyos niini.
via || Bombo LJF
