DAVAO CITY – Tak-om pa karon ang upat ka mga sibilyan nga gikaingong gi-kidnap sa rebeldeng New People’s Army (NPA) sa Agusan del Sur ug Compostela Valley Province niadtong Pebrero 5 ug Pebrero 8 niining tuiga.
Ang monitoring sa 10th Infrantry Division sa Philippine Army nagpahibalo nga upat ka mga sibilyan nga gilangkuban sa opisyal sa barangay, usa ka asawa sa Trento, Agusan del Sur; ug mag-amahan sa Maco, Compostela Valley ang gidagit.
Sa report sa 25th Infantry Battalion, ang biktima sa lungsod sa Trento mao si Barangay Pangyan Kapitan Rene Carlos ug asawa niini nga si Maribeth Carlos kinsa giingong gi-hostage sa NPA.
Sa laing taho gikan sa 71st Infantry Battalion, usa ka Jun-jun Custodio ug iyang anak nga si Marjun ang gibihag sa grupo ni alyas Mokloy, team leader sa NPA Milisya sa Bayan sa Barangay Malamudao, Maco, Compostela Valley Province.
