DAVAO CITY – Gilunop sa dagkong kalayo ang gambalay sa Tagum Doctors Hospital nga nahimutang sa Tagum City, Davao del Norte kagahapon, bandang alas-12 sa udto.
Sa pakighinabi sa Bombo Radyo Davao kang SFO1 Ryan Jospeh Rasay, Arson Investigator sa Tagum BFP nga nagsugod ang sunog sa ikaduhang andana sa maong ospital nga gisailawom sa renovation.
Luwas sab nga gipagawas ang mga pasyente lakip na sab sa mga trabahante sa gi-renovate nga 2nd floor sa maong gambalay ug wala sab nangaangol sa nahitabong insidente.
Dugang pa ni SFO1 Rasay, partially damaged lamang ang maong gambalay ug dali sab naapula ang nagkadakong kalayo nga unang nasigpatan sa usa sa mga personahe sa ospital.
Napalong pud dayon ang kalayo bandang alas-12:40 sa udto. Malampuson sab nga nahatud ang mga pasyente sa mga managlahing ospital diha sa Tagum City.
Gipakordon na sa BFP ang lugar alang sa halawom nga imbestigasyon.
Sa pikas bahin, nagpahimangno sab sa Tagum City Fire Department nga magmaampingon sa paggamit og mga de-kuryenteng mga kabtangan tungod kasagarang tinubdan sa sunog sa syudad ang electrical short circuit nga nagresulta sa pagkaugdaw sa minilyon nga kantidad sa mga kabtangan ug libuan ka mga apektadong kinabuhi.
Susama kana sa bag-uhay nga nahitabong sunog sa bodega sa susamang syudad ning nilabayng simana.
via || Bombo LJF
