Sa pagkaon na lamang unta sa mga Pinoy napadulong ang gigasto sa gobyerno sa security detail ni Vice President Sara Duterte,kini ang giluwatang pamahayag ni Presidential Adviser on Poverty Alleviation (PAPA) Secretary Atty. Larry Gadon, gumikan kay daw makapatingala ang P500 milyong pondo nga gigasto sa 433 security detail.
Mapahimuslan unta sa mga Pilipino kung ang nahisgutang pondo ang gigahin na lamang sa mga gipanggutom ug tabangan ang mga kabus nga nagkinahanglan ug panabang.
Migawas nga nakadawat ug mukabat sa P50,000 matag bulan ang 433 security ni VP Sara sulod sa duha katuig, nga nagpasabot nga mosobra sa P20 milyon matag bulan ug sulod sa 24 kabulan, mo-abot na kini sa P480 milyon.
Dugang pa niini adunay mga datos ang daling pangitaon sa online nga nagpakita nga ang Office of the Vice President (OVP) ang migasto ug P55 milyon gikan sa tuig 2022 hangtod 2024 alang sa special duty allowanxces sa mga military ug uniformed personnel.
Gikumpara usab ni Gadon sa termino sa kanhi Vice President nga migasto lamang ug P5.7 milyon matag tuig sa special duty allowances nga halayo sa P25 milyong alokasyon ni Duterte sa susamang allowance.
