Giaprobahan na sa US Senate ang funding bill aron matapos na ang government shutdown nga nagpadayon sulod sa pipila ka adlaw.
Lakip sa mga mibotar pabor sa maong bill ang walo ka Democrats ug pipila ka Republicans aron matapos na ang shutdown.
Sa pinal nga bersyon sa bill, gilugwayan niini ang pondo sa gobyerno hangtod sa Enero sa umaabot nga tuig.
Lakip usab niini ang tulo ka tuig nga pondo alang sa nagkadaiyang federal agencies ug mga programa, ug ang pagbalik sa mga federal workers nga natangtang panahon sa shutdown.
Isip puli sa suporta sa 8 ka Democrats, miuyon ang Republicans nga magpahigayon og botohan sa tunga-tungang bahin sa Disyembre kabahin sa pagpalugway sa health care tax credits.
Kinahanglan pa gihapon nga maaprubahan kini sa US House of Representatives ug malagdaan ni US President Donald Trump aron pormal nga matapos ang shutdown.
Niabot na sa 41 ka mga adlaw sukad nagsugod ang shutdown sa gobyerno sa Amerika nga mao ang labing taas nga shutdown sa kasaysayan sa US.
Tungod niini, daghang serbisyo sa gobyerno ang nasuspinde, ug 1.4 milyon ka federal employees ang wala’y bayad nga leave o nagtrabaho nga walay suweldo.
Nagresulta usab kini sa problema sa mga tugpahanan sa US, diin kapin sa 7,000 ka mga flights ang nalangan ug 2,000 ang nakansela tungod sa kakulangon sa mga staff.
Atol sa shutdown, nihangyo si Trump sa mga air traffic controllers nga mobalik sa trabaho bisan wala’y bayad, ug mibahad sa mga dili motuman.
