Apektado karon ang daghanang mga bata ug myembro sa Kingdom of Jesus Christ (KOJC) human ang pag-aproba sa Court of Appeals sa freeze order petition gikan sa Anti-Money Laundering Council batok kay Pastor Apollo Quiboloy ug sa uban pa niining kaubanan.
Gipasabot sa mga myembro niini nga dili lamang si Pastor Quiboloy ang maapektohan sa maong lakang kondi lakip na ang mga bata, organisasyon, ug daghanan pa nga nabuhi gumikan sa maong tabang sa Pastor.
Atol sa press conference sa KOJC kaniadtong nakalabayng adlaw, kalakip sa nahisgutan niini mao ang mga ginapakaon ug ginapaskwela nga libre sa pastor ang labing maapektohan niini partikular na ang Children’s Joy Foundation Incorporated.
Sukwahi matud pa kini sa laraw nga matabangan ang daghanang mga bata nga walay ginikanan nga makapadayon sa pangandoy sa kinabuhi ug makahuman og pagskwela pinaagi sa gitanyag nga mga programa ni Pastor Apollo Quiboloy.
Dugang pa niini nga sukad 1998 pa ang kasumaran sa maayong binuhatan sa pastor busa gikaguol nila ang mamahimo niining epekto ngadto sa mga indbidwal nga nabuhi ug nakakaon gikan sa maong kwarta.
Sumala pa ni Atty Dinah Tolentino-Fuentes, Legal Counsel sa KOJC, nga kalapasan sa covention on the rights of the children with the united nations ang maong lakang kung diin ginatagaan og importansya ang basic rights of the children sama sa pagkaon ug ang paghatag kanila og safety o lugar nga walay kahadlok ug walay kagubot.
Hinon, gikanayon ni Atty. Israelito Torreon nga wala silay laing opsyon kondi tumanon lamang ang maong mando apan gipanghinaot gihapon niini ang hustisya alang kanila.
