DAVAO CITY – Gibutyag ni City Tourism Operations Office (CTOO) Chief Gene Rose Tecson nga hangtud Mayo 3 ang gitanyag nga free tours alang sa mga delegado sa Palarong Pambansa.
Kahinumduman nga gawas sa sporting event himuon sab ang free tours aron nga i-promotar ang siyudad isip tourism destination.
Gitataw ni Tecson nga ang nahisgutan nga lakang kabahin pa gihapon sa MICE (Meetings, incentives, conferences, and exhibitions) destination.
Ang libre nga tour gisugdan kagahapong adlawa hangtud Mayo 3 diin usa kini ka “first come first served basis”. Apan gitino ni Tecson nga ang free tours itanyag lamang sa mga opisyales sa mga nagkadaiyang participating teams sa Palaro.
Adunay ipatuman usab nga pick-up point alang sa mga buot mosalmot sa tour.
Aduna sumala pa kini duruha ka klase diin ang Tour A magpahigayon ug walking tour ngadto sa mga partisipante sa San Pedro Square, Tribal Village ug People’s Park ning siyudad.
Samtang ang Tour B mosuroy sa pinuy-anan ni Pangulong Rodrigo Duterte, Shrine Hills ug People’s Park.
Samtang una ng gibutyag ni Mayor Inday Sara Duterte nga human ang pag-host sa siyudad sa tulo ka mga nag-unang sporting events nga gilangkuban sa Davao Regional Athletic Association (DAVRAA) sa milabay nga Pebrero, Ironman sa milabay nga Marso ug ang Palarong Pambansa, mamahimong maangkon na siyudad ang tumong niini nga mamahimong premier sports tourism destination sa nasod.
