Nagpabutyag og kabalaka ang legal team ni kanhi Philippine President Rodrigo Roa Duterte tungod sa nagkagrabe niyang kahimtang samtang ginapreso sa International Criminal Court (ICC).
Gipasabot sa lead counsel nga si Atty. Nicholas Kaufman nga nakasinati si FPRRD og pipila ka higayon nga nahulog siya sa sulod sa iyang selda, diin sa usa niini nakuyapan siya.
Human niini, gidala dayon siya sa ospital aron masusi ang posibleng kadaut sa ulo ug utok.
Sumala sa abugado, si FPRRD “kapoy na tungod sa pagpabilin sa prisohan” ug “pisikal nga dili na makalihok tungod sa daghang balatian nga kasagarang masinati sa tawo sa iyang edad.”
Giingon usab ni Kaufman nga ang administrasyong Marcos nakahibalo na sa sitwasyon human ang mga representante niini mibisita og patago sa ICC detention centre, ilawom sa pasangil nga nagpakita kuno og “pag-amuma ug kabalaka” alang sa usa sa mga lumolupyo sa Pilipinas.
Magahimo og desisyon ang ICC kung ipadayon pa ba ang pagpabilin sa prisohan ni Duterte, nga wala na makita sa publiko sukad pa sa iyang pagsurender.
