Nagpaabot sa iyahang patimbaya si kanhi Pangulo Rodrigo Duterte ngadto kang US President-Elect Donald Trump pinaagi sa iyahang post sa social media account niini, gumikan sa naangkong kadaugan ni Trump atol sa gipahigayong US Presidential Election 2024 diin gipildi niya ang kaatbang niini nga si Incumbent US Vice President Kamala Harris.
Sumala pa sa maong post sa kanhing Pangulo nga nagahandum matud pa kini ngadto kang Trump og kadagaya sa iyahang lain na usab nga hagit sa pagsolbad sa kapit-os nga nasinatian sa ilahang nasud karun.
Dugang pa ni Duterte nga lakip sab sa iyahang ginahandum alang sa bag-ong mandato na usab ni Trump, mao ang mahimong positibo sa tanang butang, alang na usab sa paghatag og kalambuan sa ilahang nasud ug sa iyahang mga katawhan.
Saysay pa usab niini sa laing bahin usab sa post sa kanhing Pangulo nga anaa sa maayo matud pa silang managhigala.
