DAVAO CITY – Nipasidaan si kanhi Pangulong Rodrigo Duterte nga dili kalikayan ang Pilipinas sa kapungot sa Beijing kon tugotan sa Manila ang Estados Unidos nga gamiton ang ilang military installations sa paglusad og “agresibo nga aksyon” batok sa China.
Sumala pa ni Duterte, nipaabot ang Chinese envoy kaniya atol sa bag-o lang nga meeting nga bisan ang Pilipinas nga usa sa pinakalig-on nga kaalyado sa China, mahimong target sa higayon nga mopasiugda og atake ang US forces batok sa Beijing.
Giangkon ni Duterte nga “regular” ang pagpakigkita kang Chinese Ambassador Huang Xilian ug matud pa, dili siya katabang sa China o tigpanalipod o tigpamaba sa Amerika.
Giawhag niya ang mga gobyerno sa Pilipinas ug US sa pagpahibalo sa katawhang Pilipino mahitungod sa mga kahikayan nga naglambigit sa mga base militar sa US ubos sa Enhanced Defense Cooperation Agreement (EDCA).
Nagpahibalo ang US Department of Defense sa mga plano sa pagpalapad sa bag-ong military sites sa Pilipinas, lakip ang Naval Base Camilo Osias, Camp Melchor Dela Cruz, Balabac Island, ug Lal-lo Airport.
Giangkon ni Duterte nga nanaghan ang EDCA sites ngadto sa 17 ka mga lokasyon sa tibuok nasud. Giawhag niya ang usa ka abli nga pakighinabi ug transparency tali sa administrasyong Marcos Jr., tungod makaapekto kining hisgutanan sa katawhang Pilipino, nga mag-atubang sa usa ka gubat.
Nahadlok si Duterte nga masantop sa paggamit og nuclear warheads ug ang mga sangputanan sa pag-atake sa US sa China mao ang pagbalos gamit ang mga armas nukleyar batok sa Pilipinas.
via || Bombo LJF
