Wala makasumite sa ilang Statement of Contributions and Expenditures (Soce) sa wala pa ang deadline nga gipahigayon niadtong Hunyo 11, 2025, si kanhi Pang. Rodrigo Duterte uban nila Jonathan Julaine ug Joselito Tan, subay sa datos gikan sa Commission on Elections (Comelec) sa Davao City.
Gikompirma sa Comelec-Davao nga duha ra ka kandidato sa pagka-mayor ang nakapasa sa ilang SOCE nga mga sila Bishop Rodolfo “Rod” Cubos ug Karlo Alexei Nograles.
Samtang wala pa gipagawas sa Comelec-Davao ang listahan sa mga kandidato sa pagka-konsehal sa una ug ikaduhang distrito, apan ilang gikatakda nga 22 sa 23 ka kandidato sa unang distrito ug 20 sa 25 sa ikaduhang distrito ang nakasumite og SOCE.
Ang lokal nga partido politikal Hugpong sa Tawong Lungsod (HTL) misumite usab sa ilang SOCE.
Sa kinatibuk-an sa syudad sa Davao, 79 sa 97 ka lokal nga kandidato ang nakatuman sa pagsumite sa ilang SOCE niadtong Hunyo 11, 2025 samtang ang 18, wala makatuman sa balaod.
Pahimangno ni Atty. Shajani Ebrahim, Third District Election Officer ug Chairperson sa Board of Canvassers sa Comelec-Davao, nga kinahanglan gayud nga mosumite og SOCE ang tanan kandidato, mapildi man o modaog.
Ang dili pagsumite mahimong election offense ug adunay silot nga multa: P30,000 alang sa mga kandidato sa House of Representatives. P20,000 alang sa mga mayor ug bise mayor. P15,000 alang sa mga konsehal.
Kung ikaduhang offense, ang silot sa kandidato sa House of Representatives ang anaa sa P60,000 ug perpetwal nga diskwalipikasyon sa pagdagan sa eleksyon.
