Angay sumala pa nga manubag si kanhing Pang. Duterte sa balaod, kini ang giluwatang pamahayag ni Sen. Risa Hontiveros human sa pag-angkon ni kanhing Pang. Rodrigo Duterte sa responsibilidad sa war on drugs sa iyahang administrasyon sa nahimong pagdungog sa Senate Blue Ribbon Subcommittee niadtong Lunes.
Giangkon sa senadora nga problema ang iligal nga droga ug krimen, apan gibarugan niini nga dili solusyon ang pagpatay ilabi na sa mga inosente ug wala’y kalaban-laban, bisan pa man ipamugos sumala pa ni Duterte nga alang kini sa kaayauhan sa kadaghanan.
Human niini, gibutyag ni Hontiveros nga naglaom siya nga ang Department of Justice, ingon man ang International Criminal Court kon ICC, ang hugot nga pagatun-an ang nahimong pag-angkon ni Duterte sa pagdungog sa Senado.
Nanawagan sab kini nga abrihan sa Commission on Human Rights sa publiko ang forensic data, police records, ug uban pang opisyal nga dokumento kabahin sa biktima sa drug war.
