DAVAO CITY- Padayon pa gihapon ang gipalawmang imbestigasyon sa kapulisan sa Davao del Sur kung aduna bay foul play o wala ang kamatayon sa usa ka lalaki nga nakit-an na lamang nga walay kinabuhi kilid sa sapa.
Kahinumduman nga patay na sa dihang napalgan duol sa sapa ang usa ka lalaki sa Purok Masagana, Sitio San Isidro, Brgy. New Clarin Bansalan, Davao Del Sur niadtong Oktobre 23.
Giila ang biktima nga si Arnold Dasan Masamloc, 28-anyos ug residente sa Pag-Asa Poblacion Matanao, Davao Del Sur.
Subay sa report sa kapulisan, nakaplagan sa usa ka 63-anyos nga si Lydia Agdan, samtang nagpakaon kini sa iyang mga pato ang patay’ng lawas sa biktima nga nagbuy-od daplin sa sapa.
Niadtong Oktubre 22, 2022, nasayrang gipangita ang biktima human nga wala na kini makauli diin mibyahe kini sakay sa iyang motor.
Nagpahigayon na karon og lawom nga imbestigasyon ang otoridad aron sutaon kung aduna bay foul play sa nahitabong insidente.
Samtang sa pikas bahin, hustisya ang singgit karon sa kabanay ni Arnold gumikan nagtuo kining wala nalumos ang biktima inay naa pay laing rason luyo sa kamatayon niini.
