DAVAO CITY – Nagpakita sa daghanag tagasuporta sa Visayas si Former President Rodrigo Duterte atol sa gipahigayong prayer rally sa Hakbang ng Maisug sa Cebu City kagabii, Pebrero 25.
Subli na sab nga nakapamulong ang kanhi pangulo mahitingod kang Pangulong Ferdinand Marcos Jr. nga gituohang nagpanalipod sa laraw nga charter change kon ang pag-amyenda sa 1987 Constitution.
Gipunting sa kanhi pangulo nga kaniadto nang giduso sa amahan niining si Pangulong Ferdinand Marcos Sr. ang pag-usab sa pipila ka panid sa batakang balaod.
Gipadayag ni Digong ang subling pag-uyon niini sa economic provisions sa konstitusyon, apan dili ang politikal nga aspeto nga makaapekto sa kasamtangan ug umaabot nga mangulo dinhi sa nasud.
Sumala pa nga haom lamang nga ipabilin ang unom ka tuig sa usa ka termino nga paglingkod sa usa ka pangulo sa nasud taliwas pa man nga laraw na sa daghanang mga presidente sa nasud ang term extension kon ang paglugway sa mga katuigan sa ilang paglingkod isip pangulo sa nasud.
Samtang, dungan sa maong prayer rally, nagpabuhi na sab og init nga pamulong batok kang Pangulong Ferdinand Marcos Jr. si Davao City Mayor Baste Duterte.
Gibanatan sa mayor atubangan sa mga supporters sa Cebu ang pangulo human ulahi kining nagpagawas og kalagot sa kasamtangang administrasyon sa nakalabayng prayer rally dinhi sa Davao City, usa ka bulan ang milabay.
Gitira sa mayor ang sumala pa pagpasagad sa ilahang katungdanan pinaagi sa pag-amyenda konsitusyon sa Pilipinas pinaagi sa paggamit sa people’s initiative, ug ang daw laraw nga pagpalugway sa termino nga mamahimong gamiton sa pagpanlibong ug kurapsyon.
Tahasang gihagit ni Mayor Baste ang pangulo nga magpakita og pruweba nga naghatag og ayuda nga wala nakabutang ang iyang nawong.
via || Bombo LJF
